WiFi sare publikoak gune publiko askotan aurki ditzakegun Interneteko doako konexio-puntuak dira. Baina segurua da horrelako sareetara konektatzea?
Gure azken artikuluetako batean, “Internet Seguruaren Eguna” izenekoan aipatzen genuen puntuetako bat WiFi publiko bat erabiltzean izan beharreko zainketa zen. Badirudi puntu horrek galdera batzuk sortu dituela, beraz artikulu hau idaztea pentsatu dugu galdera hoiei erantzuten saiatzeko.
Kafetegi, hotel, merkataritza-gune edo tren edo aireportuko gune batera iristsi eta «Doako Wifi» seinalea ikusten dugunean, izugarrizko posa edo lasaitasuna sortzen zaigu, batez ere gure datuen kontsumo mugara iristen ari bagara. Baina kontuz, WiFi mota hoietara konektatzean, ia inoiz ez dugu pentsatzen sare horretatik transmititzen ari den informazioaz ez dugula inolako kontrolik, eta ez dakigula ere nor dagoen beste aldean konektatuta.
Lehenik, ezagutu ditzagun WiFi publiko mota nagusienak:
- Sare irekiak: WiFi puntu hauetan sartzeko ez dugu pasahitzik behar. WiFi sarearen izenaren gainean klikatu eta kito. Normalean eraikin publikoetan edo parkeetan egoten direnak dira, kontuz ibili hauekin.
- Sare publikoak baina itxiak: hoteletan izaten ditugunak dira. Egia da hoteleko bezeroek bakarrik erabil ditzaketela, baina ehunka pertsona sar daitezke hotelera; beraz, kontuz ibili behar da.
- Erabiltzailea eta pasahitza eskatzen dituzten sareak: edonork erabil ditzakeen arren, erabiltzaile izen bat eta pasahitza eskatzen dizkizute aldi baterako. Adibidez, aireportuan topa ditzakezun sareetara sartzeko zure ontziratze-orrian ematen dizkizuten datuak erabili behar izaten dira.
- Sare sozialak. Merkataritza-gune batzuek beren WiFi-ra sartzeko gure sare sozialeko profilaren bidez konektatzeko aukera ematen digute.
WiFi publiko horiek erabiltzean hainbat arrisku izan ditzakegu. Norbaitek sare hori erabili dezake gure gailu elektronikora konektatu eta ez eginbeharrekoak egiteko: gordeta ditugun datuak lapurtu (argazkiak, pasahitzak…), gure kontuetara sartu (sare sozialetakoak zein bankuetakoak), birusen batekin kutsatu, etab. Beraz, doako sare horietako batera konektatu aurretik kontuan izan puntu hauek:
- Ahal baduzu, ez konektatu WiFi sare ireki batera (pasahitzik eskatzen ez dutenak). Bai sare-administratzaileak bai konektatuta dagoen edozein erabiltzailek zure gailuko informazioa lapurtu diezazukete.
- Saiatu aplikazioak eguneratuta edukitzen; horrela segurtasun-zuloak ezabatuko dituzu.
- Ziurtatu sartzen zaren webgunea https dela (giltzarrapoarekin) eta ez http. Horrek ez dizu erabateko segurtasunik emango, baina gutxienez datuak zifratuta nabigatzen dutela jakingo duzu.
- Ez eman datu pertsonalik. Saia zaitez datu pertsonalak eskatzen dizkizuten inprimakiak ez betetzen horrelako sareak erabiliz.
- Saihestu saioa hasi behar dituzun tokiak (erabiltzailea/pasahitza).
- Desaktibatu sinkronizazioak. Gailu askok hainbat lan/aktualizazio egiten dituzte ‘bigarren mailan’ (agendak, egutegiak sinkronizatzea, posta elektronikoa deskargatzea…); sare ez-seguru batera konektatzen bagara, zerbitzu horiek desgaitzea gomendatzen da.
- Antibirusa: ordenagailuan antibirus bat izan arren, zure mugikorrean bat instalatzea ere ez dago gaizki, batez ere wifi sare irekietara konektatzeko ohitura baduzu.
- Ez erabili banku-aplikaziorik. WiFi publiko mota hau erabiltzen baduzu, ez da gomendagarria bankuaren aplikaziora edo beste edozein ordainketa-tresnatara sartzea, ez erosketarik egiteko ez eta zure saldoa kontsultatzeko ere.
Eta, azkenik, horrelako wifi sare batetara konektatzen bazara, amaitu ondoren, zure gailu elektronikoak memorizatutako sare-datu hoiek ezabatzen zaiatu. Hau da, gailu elekotroniko gehienek memorian gordetzen dute konektatzen garen sareen zerrenda (baita sarbide-datuak ere). Beraz sartu gailuaren “Ajustes” aukeran, bilatu “Red” edo “Wifi” aukera (gailu desberdinek, opzio ezberdinak dituzte), eta ezabatu erabili berri duzun sarea.
